شيرى مجدى: تكريمى من البابا أهم حدث فى حياتى
حوار :كمال سلطان-المصريين بجد
شيرى مجدى ممثلة شابة شاركت فى العديد من اﻷعمال الفنية المتميزة للسينما والتلفزيون مثل أفﻻم “امن دولت” مع حمادة هﻻل و”توم وجيمى” مع هانى رمزى ومسلسﻻت “رقم مجهول” ، “اسم مؤقت” ، “قلوب” و “بين السرايات” واخيرا وليس اخرا “نهار خارجى” ..
* كيف كان شعورك عندما تم تكريمك من قداسة البابا تواضروس مؤخرا؟
** فخورة جدا بهذا التكريم وأعتبره أهم حدث فى حياتى وخاصة أن قداسة البابا شخصية عظيمة وجليلة ، وقد تشرفت جدا أن يتم تكريمى بمعرفته واحساس التكريم فى حد ذاته احساس جميل خاصة أننى فى سن صغيرة ورأوا أننى تميزت فى أداء الدور وهذا يحملنى مسئولية كبيرة تجاه الناس وأتمنى أن أكون عند حسن ظنهم.
* تكريمك جاء عن دورك فى فيلم “49 شهيدا” ، فما هو دورك بالفيلم وماهى فكرته الأساسية؟
** اجسد شخصية “فيرونيا” التي تعيش مع أسرتها الصغيرة زوجها وابنها في سعادة ومحبة ولكن الغدر والظلم يشاء ان يستشهد الزوج والابن وتبقي وحيدة و حزينة ، وتدور اﻷحداث عن قصة 49 شيخ كانوا رهبان في برية “شيهيت” في القرن الرابع و استشهدوا علي يد البربر وهو يعتبر قصة تاريخية أكثر منها دينية.
* بدايتك الفتية .. كيف كانت؟
** بدايتي كانت من 2010 من حلقة في تامر وشوقية ..وتتوالي الادوار الي فيلم امن دولت وبعدين فيلم توم وجيمي من اخراج اكرم فريد الي دور صغير في مسلسل رقم مجهول ثم دور اكبر في مسلسل اسم مؤقت 2013 من اخراج احمد نادر جلال والذي يعتبر الظهور الحقيقي لي .. ثم مسلسل قلوب ومسلسل بين السرايات ..الي بطولة مسلسل نهار خارجي.
* وما هى نوعية الأدوار التى بتستهويكى؟
** يمكن كل الأدوار اللي عملتها مكنش فيهم شبه من بعض .. بس انا احب الأدوار الصادقة التي تلمس كيان الناس من الداخل تلمس اوجاعهم وحياتهم ومشاكلهم .. والى الآن انا لسة مامثلتش او ماعملتش الدور اللي يظهر موهبتي وامكاناتى الحقيقية.
* وايه الدور اللى كان نفسك تعمليه؟
** دور المجذوبة .. الناس اللي بتمشي في الشارع متوسخة ومنكوشة والناس بتخاف منهم .. كان شخص عادي والزمن والقدر جعله لايقدر أن يعيش لا منه مجنون ولا عاقل.
* مﻻمحك ممكن تحصرك فى ادوار الفتاة الرومانسيه؟
** لا فأنا حريصة على التنويع فى أدوارى فمثﻻ دوري في اسم مؤقت كان “فرح” بنت شقيانة وبتحب خطيبها وبتخاف عليه وهي وخطيبها عارفين القصة الحقيقية لبطل المسلسل وهما اللي بيحكوا له حكايته لما فقد الذاكرة .. كان أبعد شخصية عني تماما لا في شكل ولا في اسلوب كنت مختلفة تماما، اما دوري في نهار خارجي .جيهان مديرة انتاج في الوسط الاعلامي وتظهر مسترجلة احيانا كثيرة ولكن تحب شخص فتبدأ تبان امامه دائما بانها البنت الرقيقة كي تجذبه لها لكنها لا تتخلي عن السيطرة والشخصية القوية ممزوجة بطيبة البنت وخوفها، ودور جيهان في نهار خارجي يعتبر الدور الذي يمثلني شخصيا .. شبهي جدا.
* احﻻمك وطموحاتك فنيا وانسانيا؟
** احلامي أن أعمل إسم يفتكروا التاريخ مش مجرد حد مثل ومشي .. وطموحي اني أحقق عن طريق شغلي رسايل بجد تهم الناس مش مجرد تمثيل وخلاص .. ولو كبرت واتشهرت وبقيت نجمة مفيش مانع من اني استغل نجوميتي في اني اعمل عرض مسرحي مثلا كل دخله يطلع للمستشفيات والمحتاجين، ربنا مدينا موهبة مش عشان نفرح بيها احنا بس، اما انسانيا مش عايزة غير الستر والصحة فقط والرضا.
* ماهى مواصفات فارس احﻻمك؟
** يكون راجل وفي قلبه ربنا عشان يقدر يبني بيت صح .
* ولو طلب منك اعتزال الفن؟
** لا .. انا انسانة من حقي اني اشتغل الحاجة اللي شايفة نفسي فيها مش اللي شايفني هو فيها .. وكما ماقلت يشجعني ويقف جنبي لو هيلغي كياني يبقي لا طبعا.
