داليا عطية تتساءل:امرأة تصارع الزمن”هل يهتم احد بنصرة سائقة الميكروباص ام محمود امام تعنت اللواء عمار؟”

المصريين بجد 

كتبت الزميلة داليا عطية قصة السيدة ام محمود سائقة الميكروباص التي تعنت معها احد ساكني مدينة الضباط التي تستأجر فيها مكان اقامتها لأنه لا يراها تليق بالمدينة فهل من مهتم برد الظلم عن امرأة تكد لتحمي اطفالها من الاحتياج والانحراف 

وجاءت القصة بصياغة داليا دون اي تحريف او تغيير من قبل ادارة الموقع كالتالي

ونحن نضم صوتنا الي داليا لعل هناك من يسمع استغاثة امرأة تصارع الزمن

فاكرين #ام_محمود اللي حكيتلكم قصتها ؟ .. الست اللي بتشتغل سواقة ميكروباص بعد ماانفصلت عن زوجها علشان تربي ولادها ال 4 بالحلال .. الست اللي اشتغلت مهنة كل مافيها قرف من الصعوبة والشمس والدوشه وقلة الأدب اللي بتشوفها من موقف العاشر ده غير طبعا اللي بتسمعه وغير طبعا النظرات اللي دايما بتقوللها ف صمت انها واحده مطلقه وإيه ينزلها تشتغل! .. الست اللي ساكنه ف مدينة الظباط علشان بتفضل من 9 الصبح ل 9 بالليل واحيانا 12 بالليل شغاله ع الميكروباص فاختارت تسكن ف مدينة الظباط علشان تبقا مطمنه علي ولادها ف غيابها انهم ف مكان امان ومحدش هيدايقهم او ياخدهم لطريق مش كويس انتم عارفين صحاب السوء وجيران السوء طبعا.. الست دي قاعده ف مدينة الظباط بقالها 4 سنين محدش سامعلها صوت من بيتها للميكروباص ومن الميكروباص لبيتها ومش عاوزه حاجه من حد غير بس الاحترام الست دي ماوقفتش تتسول ف اشارة مرور ولا فرضت نفسها علي حد ف محطة مترو ولا مدت ايديها باسم المساعده والكلام ده لأ هي حفرت ف الصخر وعافرت واشتغلت الشغلانه اللي لقيتها متاحه قدامها ومبصتش ان الشغلانه دي مموته شكلها كواحده ست ومموته ملامحها ومدمره حالتها النفسيه من اللي بتسمعه كل يوم لأنها كل هما جملة واحده بس وهي ” عايزه اربي عيالي بالحلال ” فمش باصه لشكلها ولا للذل اللي بتشوفه كل يوم .. الست دي كانت مهددة بالطرد من بيتها بسبب اللوا عمار اللي من زمان شايف انها مينفعش تسكن جنب لوا وشكلها مش مشرف علشان تسكن ف مدينة الظباط وبيدايقها ف الرايحه والجايه وهي كانت معتمده علي انها ست ف حالها وصاحبة البيت بتحبها وحاسه بظروفها وكمان هي ملتزمة ف دفع الايجار فكانت مطمنه ان اللوا عمار مش هيعرف يخرجها لكن للأسف اللوا لعب ف دماغ صاحبة البيت وقدر يقنعها ان ام محمود تخرج بره المدينه ومش مهم تروح فين تولع بجاز عادي المهم منشوفش واحده سواقة ميكروباص بين سكان المدينه وللأسف ام محمود بعد ماكان اللوا عمار مانعها من دخول بيتها من يوم الجمعة اللي فاتت وسايبها تنام ف الشارع احنا نزلنا بوست عنها فسمح لها تدخل تنام ف بيتها لكن اداها مهله 3 ايام انها تلم حاجتها وتمشي .. ام محمود هتتطرد النهارده من بيتها ومش عارفه هتروح فين بولادها ومدارسهم اللي مرتبطين بيها مع إن في 3 سواقين ميكروباص جوه المدينه غير ام محمود وعلي فكره منهم ناس اتمسكت وهي بتبيع مخدرات جوه المدينه ولسه قاعدين بردو عادي وبيشتغلوا بردو عادي وبيمارسو حياتهم بردو عادي لكن الست تطلع بره علشان شكلها مش مشرف اللوا عمار
هي ام محمود لو كانت ملونه وشها بالميك اب ولابسه ضيق وقصير وحاطه لينسز كانت هتعجب اللوا عمار وللا إيه علشان بس جبت اخري والله!
لو سمحتم اعملوا #شير للحالة وساعدوا الست لأني والله مافي بإيدي غير الكتابة يمكن بمشاركتم توصلوا حالة ام محمود لمسئول عنده دم ! .. الست هتتطرد من بيتها هي وولادها النهارده فين #معتز_الدمرداشفين #عمرو_أديب فين #إيمان_الحصري فين #مني_العراقي فين اللي مسئول عن ام محمود فين البلد اللي مش قابله واحده ست عايشه تعيش بالحلال !!!
#داليا_عطية
الكلام علي مسئوليتي الشخصية وأجري علي الله