الدكتور علاء حمودة يجيب عن اسئلة الأصدقاء عن “روني”أحدث أختراعاته
إيمان زيدان-المصريين بجد
في السطور التالية يجيب الدكتور علاء حمودة عن اسئلة اصدقائه عن أختراعه الذي أسماه روني وهو عبارة عن طائرة بدون طيار تكشف المتفجرات وتفتك بها عن بعد دون ان تتدمر او تتأثر -عن ماهية الاختراع وطريقة عملة كتب حموده علي صفحته علي الفيس بوك
“
أصدقاء كتير راسلتني تتساءل عن “روني RONI”.. الطيارة بدون طيارة الجديدة اللي ربنا وفقني وعملتها.. و ناس بتسأل “إزاي الطيارة بدون طيار تبقي (اختراع) و هي موجودة أساسا”.. و أسئلة أخرى نحاول نجاوب عنها هنا…
أولا.. دمج تكنولوجيا أو أكثر موجودة مع غيرها عشان تؤدي وظيفة جديدة.. دا اختراع.. الإختراع مش لازم يتعمل من الصفر.. لأ.. ممكن تدمج أشياء موجودة و تطلع باختراع جديد..
الكاميرا تكنولوجي موجودة.. و المحمول تكنولوجي موجودة.. في واحد دمج الكاميرا و الموبايل معا.. و عمل تليفون بكاميرا.. دا اسمه “إختراع Invention/ Innovation”…
“روني RONI” مروحية رباعية صغيرة بدون طيار.. بتكشف المتفجرات و تنسفها عن بعد..
روني بتؤدي نفس دور روبوت المفرقعات.. بس روبوت المفرقعات بيقرب جدا من المفجر.. و يشيله.. و يخبطه.. و دا في الغالب بيخليه ينفجر في الروبوت.. الروبوت دا تمنه بيتراوح من 180 ألف إلي 300 ألف دولار.. يعني بنتكلم في المتوسط في خسارة 2 مليون جنيه مع كل قنبلة…
بينما روني بتكشف و تفجر عن بعد و تفضل سليمة.. و تكلفتها مش أكتر من 700 دولار…
المزايا اللي بتملكها روني عن الروبوت موجودة في ملخص البراءة تحت عنوان “الفن السابق Prior art”..
ملخص براءة الإختراع ببعض المعادلات – خصوصا المتعلقة بالاتزان – منشور علي موقع “دوك درويد Doc droid” وموجود في أول مرجع للي يحب يطلع عليه.. اللي مش حتلاقيه في البراءة هو البرنامج.. السوفت وير.. لأنه قيد التطوير و مش خاضع للحماية القانونية لسه…
البراءة دي بسيطة جدا و مش معقدة لأنها عبارة عن مزج لتقنيات موجودة.. زي ما قلنا…
روني راكب عليها تكنولوجي معينة موضحة بالتفصيل في براءة الإختراع “رقم United States Patent 6,344,818 “.. لينك البراءة دي موجود في ثاني مرجع للي يحب يقراها تفصيلا…
روني مزودة بكاميرا بتلف 360 درجة، و مثبت معاها “دايود ليزر Laser Diode” قوي بيضرب “شعاع 750 mW”.. بيطلق الليزر مكان ما الكاميرا تشوف..
اللي بتعمله الطائرة الصغيرة دي انها بتكشف المفجر من علي مسافة مثالية تقدر بـ 150 متر.. و بتبعت للي بيشغلها علي شاشة الريموت كونترول.. بيانات بحجم المفجر و نوعه ووزنه بالتقريب و النطاق التدميري المحتمل.. يعني تقولك “دا تي ان تي.. وزنه خمسة كيلو.. حيفجر دائرة قطرها كذا متر”.. بالتالي تخليك تعمل كردون و تتعامل مع المفجر..
التعامل بيكون عن بعد.. مما يعني خفض الخسائر البشرية و الأضرار اللي بتحصل لخبراء المفرقعات للصفر…
بالإضافة إلي إن روني بتشوف في الظلام بالأشعة دون الحمراء.. الحقيقة هي عدساتها بتتكيف على الضوء.. لو ضوء سطع فجأة تفصل الأشعة دون الحمراء لوحدها و تشتغل علي الضوء العادي.. و لو في ظلام دامس.. تقدر تشوف عادي…
لو الهدف متحرك.. روني ممكن تطارده.. اللي بيشغلها بس “يضغط lock on target” و هي تطارد المفجر المتحرك.. ممكن يبقي المفجر متحرك؟ ايوه.. إرهابي مفخخ مثلا…
لو بطارية روني قربت تنضب مع المطاردة.. فهي راكب فيها سيستم “تحديد مواقع GPS”.. يخليها ترسل خريطة باحداثيات المكان الي هي فيه لأقرب “روني” زيها.. تكمل شغلها.. و ترجع هي القاعدة من تلقاء نفسها..
مراوح روني حادة للغاية زي الشفرات.. بالتالي محاولة الإمساك بيها و هي شغالة تكلفك كفيك.. و عامة.. لو روني وقعت في أيد غير أمينة.. تقدر تبعت إشارة معينة لبطارياتها و تنفجر…
روني تقدر تسبق المدرعات بمسافة آمنة.. عشان تكشف تفخيخ الطرق أو السيارات زي ما حصل في اغتيال المرحوم المستشار هشام بركات…
روني تقدر تدخل نفق بيستخدمه إرهابيين و تجيب آخره و تصورهولك بالكامل.. و لو قابلها اي عنصر معادي.. هي غير مسلحة.. بس لو اطلقت شعاع الليزر في الفراغ في مكان ضيق.. الشعاع دا يعمي كل من يراه مرة واحدة و للأبد لأنه وهج الشعاع اللي أعلي من 5 مللي واط بيحرق خلايا الشبكية.. تقدر تقرا نبذة عن دا في ثالث مرجع…
روني تقدر تدخل حواري ضيقة و شقق فيها مسلحين أو ذخيرة او متفجرات او افخاخ او الغام قبل قوات الإقتحام.. تقدر تحلق علي ارتفاع آمن و مسافة مناسبة من كهف فيه إرهابيين و تفقدهم بصرهم بالليزر للأبد.. بالتالي هي ممكن استخدامها في تطبيقات تانية غير كشف المتفجرات..
اللي يحب يقرا مقال شيق عن الليزر.. يرجع للمرجع الرابع …
روني حصلت علي حماية وطنية و دولية مؤقتة.. طبعا لسه مانزلتش “داتا بيز database” عشان بس الناس اللي بتجري تدور في داتا بيز البحث العلمي و تقول: أصل مش موجودة…
بعد الحماية المؤقتة.. بيبدأ فحص لو محدش عمل زيها قبل كده.. و بيبدأ سكان الرسوم و ادخال البراءة و المراجعة.. و دا بياخد كحد أقصى 30 شهر.. بعدها تنزل داتا بيز و تصدر الحماية النهائية…
الصور دي مش لروني الحقيقية.. هي صور معدلة عشان تقرب الفكرة مش أكتر.. كل الصور الخاصة بروني في لينك البراءة الي قلنا عليه…
روني 2 حصلت علي حماية مؤقتة و لسه جاري قيدها.. و بتفرق عن روني الحالية انها بس مزودة برادار.. يمنعها تصطدم بالأشجار أو العوائق و يخليها تتفاداها من تلقاء نفسها.. حتى لو اللي بيشغلها من ورا الريموت كونترول غلط… و بتقبل الاوامر الصوتية من مشغلها…
النهاردة تقدر تعمل كمين خرساني و أفراد الأمن تكون علي بعد 150 – 200 متر أو اكثر.. و تبعت روني تفحص السيارات و تشوفلك الرخص كمان و تنقل لك صورتها لايف علي شاشة الريموت كونترول…
جسم روني مقاوم للرصاص أو بشكل عام معظم الأسلحة الخفيفة.. ضد الماء فبتشتغل في المطر عادي…
هي في رأيي ممكن استخدامها لتحييد معظم حروب العصابات.. قصة “الإرهابي اللي لابس زينا و شايل مفجر و مش باين انه إرهابي” ممكن تنتهي…
“روني اختصار Remote Optimal Nitrates Ignition”.. في المرجع الخامس فيديو لروني صممه الكبير أوي “إبراهيم الباز Ibrahim Elbaz” و روني كانت لسه مجرد فكرة علي الورق..
كلمة “درون Drone”.. معناها روبوت بشكل عام.. و بتطلق علي “الطائرات بدون طيار Unmanned aerial vehicle”.. الحقيقة روني تستحق التسمية دي بجدارة.. هي درون.. روبوت طائر بدون طيار…
عايز اقول كلمة أخيرة.. أنا دراستي للشق دا مش أكاديمية.. مجرد كورسات و دراسات حرة.. بالتالي.. شبابنا.. طلبة هندسة و الكليات و المعاهد التقنية.. اللي انا باعمله في سنة.. تقدروا تعملوه في 3 – 4 شهور بدون مبالغة.. ماتخجلش من أفكارك و اشتغلها.. اي حد عنده معرفة بسيطة أو أحسن مني و “بارع skilled in the art”.. يقدر يعمل حاجة
صدقني تقدر تفيد نفسك و بلدك.. و تغير كتير…
و الله من وراء القصد،،،،
المراجع
————————
1 – https://goo.gl/lr4WSN
2 – https://www.google.com/patents/US6344818
3 – http://www.laserpointersafety.com/laser-hazards_head-eyes/laser-hazards_head-eyes.html
4 – https://goo.gl/dmp7wX
5 – https://www.youtube.com/watch?v=HAoF6S9o8A0
