محمد قاروب يكتب رواية :الشيخ محي الدين

محمد قاروب-المصريين بجد

الفصل العاشر: شيخ الإسلام جلس عارف مع أبيه الحج محفوظ وعمه الاستاذ عبد الحكيم الذي يعمل بوزارة الأوقاف المصرية. وكان عارف يعلم حب ابيه الشديد للصالحين والعلماء الربانيين الأموات منهم والأحياء على حد السواء. وكم كان الحج محفوظ يقص على راغب وهو صغير كرامات الأولياء ومناقب أل البيت والسادة الصحابة رضوان الله عن الجميع حتى شب راغب يحب الله ويحب أهله. قال الحج محفوظ : شوفت يا عبد الحكيم يا خويا الدنيا متشقلب حالها ازاي؟ الباطل متزين والحق ملهوش صوت! غسيل الدماغ والعيال اللي بيتلعب بيهم والله حاجة تقرف! رد عبد الحكيم: دول يا محفوظ ياخويا ودن من طين وودن من عجين. العيال تفهمهم الصح وتديهم الحجج والبراهين يعندوا أكتر ويقولوا انتوا مطبلاتيه بتساندوا الحكومة ومش يهمكم دين الله ولا عايزين تطبقوا شرع الله وأحكامه ! الواحد منهم يا محفوظ تلاقيه لمض حافظ ومش فاهم تيجي تعرفه الحق يملص منك ويزوغ زي التعابين! ويقولك دا كلام ابن تيمية شيخ الاسلام ويقولها كده وهو منشكح وكأن تاريخ الاسلام مفيهوش شيخ اسلام غيره أو ان ابن تيميه معصوم لا ينطق عن الهوى! أو ان التاريخ الاسلامي كله قد عجز عن الاتيان بمن هو مثله ومن يفوقه علما وفقها ، تهريج ما بعده تهريج والله. علق راغب: ميعرفوش ان شيخ الاسلام دي مكانة كانت لعشرات العلماء في الماضي أمثال الامام الغزالي والجيلاني والنووي وابراهيم الدسوقي وزكريا الانصاري وابن حجر العسقلاني وفخر الدين الرازي وابن الجوزي وابن عساكر وغيرهم الكثير وفي وقتنا الحاضر أحق الناس بيها شيخ الأزهر اللي بيكفروا مؤسسته وبيلمزوه في دينه والعياذ بالله! ابن تيمية يا عمي رجل من علماء المسلمين له ماله وعليه ما عليه. صحيح له طامات كبرى وشذ عن الاجماع في حاجات من المسلمات لكنه يبقى عالما من اكابر علماء المسلمين ، ولعلم حضرتك أغلب أفكارهم اليوم ابن تيمية نفسه برىء منها زى موضوع كرامات الاولياء اللى يقعدوا يضحكوا لما نجيب سيرتها وهم لا يعرفون ان ابن تيمية ذاته في كتابه الفتاوى الكبرى ذكر الكرامات وأيد حدوثها لعباد الله الصالحين. واللي هيموتهم غيظ لما يعرفوا ان اغلب فتاوى ابن تيميه في الفتاوى الكبرى هي في الواقع فتاوى اخذت عن شيخ الاسلام عبد القادر الجيلاني صاحب الطريقة القادرية الصوفية السنية. يعملوا ايه دول فى نفسهم لو عرفوا ان الامام النووي صوفي وابن حجر العسقلاني صوفي وشيخ القراءات زكريا الانصاري صوفي والامام ابو حامد الغزالي صوفي والامام الشعراوي والامام أحمد الطيب صوفي والناصر صلاح الدين الأيوبي صوفي بل ان دولة أل عثمان التركية التى حكمت الأمة الاسلامية لقرون كانت دولة صوفية وكان ابرز ملوكها المجاهدين بايزيد الصاعقة ومحمد الفاتح وسليمان القانوني كما أن الامام ابو حنيفة النعمان امام المذهب الحنفي صوفي . للاسف يا عمي دول لا بيفهموا واقع ولا يعرفوا تاريخ ولا شايفين مستقبل الا في عويلهم على المنابر وقنواتهم التى توصل للجنة . “عليك نور يا عارف” رد عبد الحكيم. تصدق يا عارف انهم بينكروا أي فتاوي تصدر عن دار الافتاء المصرية ويعتبرون وسطية الدين والسعة في الإفتاء من البدع! هم لا يصدقون الا حرام حرام شرك شرك . علشان كدا تلاقيهم بيصدروا للمصريين فتاوى الوهابية أمثال ابن باز وابن عثيمين وغيرهما . صدعوا دماغنا وخلوا حياتنا كلها بدع طب سؤالي ليه سكت علماء السعودية عن ساعة الملك عبد الله رحمة الله عليه في الحرم أليست بدعة! سكتوا ليه ؟ دول محترفين الكيل بمكيالين يعدوا بمزاجهم ويحرموا بمزاجهم. تيجي تنتقد بعض علمائهم يقوموا الدنيا عليك ومش يقعدوها! يا سبحان الله أليس هذا نفسه فعلكم معنا ومع علمائنا وأكابرنا. دا يا مؤمن ال البيت مسلموش من ألسنتهم فتلاقي منهم اللي يقولك الصنم اللي في مصر اللي اسمه الحسين ” قطع لسانك لما تقول على سيد شاب أهل الجنة وريحانة رسول الله صلى الله عليه وسلم كدا” واللي يكتبلك على مسجد السيدة زينب بنت الامام علي” سترحلين مع النظام” ايام حكم الجماعة اياها، شلت يمينك وهل مصر الا ببركة الله فيهم أل الطهر والرحمة والبركات بنص القرءان ذاته. دول عيال مجانيين لا علم ولا فهم ولا فقه ولا أدب ولا أخلاق شوية بغبغانات أخر علمها التكفير. علق الحج محفوظ: فين المسلمين من أخلاق المسلمين! ومن رحمة وانسانية سيدنا النبي صلى الله عليه وسلم وال بيته وصحابته؟ فين العلم الصحيح والفهم الصحيح والعمل الصحيح؟ خلوا الدين فرق وجماعات وتناحر وشقاق! وافتعال حروب ليقضي على كل أخر بدعوى أن صحيح الدين عنده. ازاي تقنعني أن الدين معاك وانته منافق سافك للدماء لا المسلمين بيسلموا لا من يدك ولا لسانك. تفجير وقتل وقلة أدب وانعدام ضمير. بس ربنا فوق الكل وربنا ينصر الحق واهله. دولة الباطل ساعة ودولة الحق ستنتصر وستظل لقيام الساعة.