بالصور:رسالة من زوج إلى زوجته تشعل مواقع التواصل الإجتماعي “إبقي زودي اللحمة في البشاميل”
سامح عبده-المصريين بجد
حاول زوج مصري مصالحة زوجته “ميرنا” بطريقة مختلفة وبكلمات رومانسية على لافتة كبيرة وضعها أمام نادى جزيرة الورد بالمنصورة، كتعبير عن حبه له وسعادته معها.
وكتب على اللافته التى بدأها باسم زوجته “إنتى من أحلى الحاجات اللى حصلت لىّ في حياتي، إنتي الحياة من غيرك ملهاش أى لازمة، إنتي وجودك في أي مكان بيكون جنة، فما بالك بقى وجودك في حياتي عامل إيه، إنتي هدية ربنا ليا في عام 2016، كلمة وهاقولها ليكي قدام العالم كله، لو حكمت أنا باموت فيكي وربنا يخليكي ليا”.
واستطرد الزوج مداعبًا زوجته من خلال اللافتة “هطلب منك طلب كده، إبقي زوّدي اللحمة في المكرونة البشاميل بعد كده أبوس إيدك”.
وحرص عدد من النشطاء على مواقع التواصل الاجتماعي تصوير ومشاركة اللافتة.
ولاقت رسالة “ميرنا” استحسانًا وإعجابًا من المئات وعلق بعضهم قائلين “لسه فيه ناس برغم إن كل حاجة حوالينا بتدعو للتشاؤم قادرة تحب وتقول كلام رومانسي يهون عليها أي مشكلة”.
وعلقت سيدة قائلة “«يا ستي إبقي زودي اللحمة خلي الراجل ياكل ويتبسط”، وأضاف آخر: “وآدي آخرة إللى ماتزودش اللحمة لجوزها”، وتابع ثالث “أهوه فضحها أهوه قدام الناس”.
وعلقت الإعلامية مفيدة شيحة على الرسالة – في برنامج “الستات مايعرفوش يكدبوا” المذاع على قناة “سي بي سي” – “اعتقد ده سبب الخناقة، المكرونة الطبخة الغدوة كلمة منها كلمة منه اتخنقوا، هو بيصلحها وبيبكتها، بس إحساس حلو، أجمل حاجة في موضوع الاعتذار الإحساس أن في حد مهتم بزعل التاني، أوحش حاجة في الدنيا تكوني زعلانة من حد ويعيش حياته أن كل حاجة تمام، قليل من الاهتمام لا يفسد للود قضية”.
ومن جانبها علقت الإعلامية منى عبد الغني قائلة :”اللطيف أن كل واحد فسر الرسالة من وجهة نظره، الشكوي حب وإبقاء على الحياة الزوجية بدل ما نوصل للصمت، ثقافة الاعتذار جميلة”.
