إنجي أنور تروي كواليس لقائها مع الراحل أحمد زكي
المصريين بجد
روت الإعلامية إنجي أنور، عبر صفحتها على التواصل الاجتماعي، كواليس لقائها مع الراحل أحمد زكي بناء على طلب من صديقتها الإعلامية دعاء فاروق.
وتقول إن الجميل أحمد زكي..كان لسة نازل من عند عبدالرحمن حافظ رئيس اتحاد الإذاعة والتليفزيون في ذلك الوقت ..كان نازل فرحان جدا بمشروع فيلم جديد” حليم “..ديكور برنامج ” آخر كلام ” كان فيه ٣ أماكن..قلتله تحب تقعد فين؟ قاللي” هنا عشان حسين كان قاعد هنا الأسبوع اللي فات” وشاور على المائدة المستديرة اللي قعدنا عليها وكان قصده على حسين فهمي اللي كان ضيفنا في الحلقة اللي قبلها وده كان معناه إنه أحمد زكي بيتفرج علي.
وأضافت قائلة:” كنت قلقانة منه جدا بس أول ما دخل الاستوديو كان بيضحك وقعد يهزر معايا..كان متواضع جدا وكان منطلق في الحديث ..ولما خلصنا الحوار وبعد ماختمت الحلقة وسلمنا على بعض ووقفنا قاللي ” لأ ده مش آخر كلام ده أول الكلام أنا لسة ما شربتش الشاي “وقعد تاني ومسك كوباية الشاي قعد يشرب وكملنا حوارنا وكملنا الحلقة اللي استمرت ساعتين..كان رائع وجميل وعنده طاقة كبيرة وعاوز يعمل حاجات كتير..وكان بيفكر في فيلم عن مبارك”.
وتابعت تحدثنا عن مشروع فيلم حليم..المشروع اللي فضل يحلم بيه سنين طويلة وكان كل شوية يقوللي هو أنا بتكلم كتير؟ وقعد يسألني عن رأيي في كلامه بتواضع حقيقي وباهتمام رغم إني كنت صغيرة جدا ولسة متخرجة من الكلية..تواضع الفنان الحقيقي الذي يفتقده أنصاف المواهب ومدعي الفن.
