أسامة كمال: العيش اللى يجى من البلطجة والحرام والظلم عيش معفن وفاسد والله الغنى عنه

قال الاعلامى أسامة كمال، ان هناك من يقوم بفتح جرنال تحتب بير السلم، واعلاميون يتاجرون بأوجاع الغلابة ، واخرون يفتحون منظمات حقوقية للحصول على تمويل، وكل ذلك يندرج تحت مسمى مصطلح “اكل العيش”.

وأضاف كمال خلال تقديمه برنامج مساء dmc، الذي يقدمه على فضائية الـ dmc، قائلا:” وصلنا اننا نقول ما هو كله أكل عيش، على مين؟ واحد فاتح جرنال تحت السلم، إعلامي بيتاجر بأوجاع الغلابة عشان ياخد مرتبه اخر الشهر، واحد فاتح منظمة حقوقية ياخد من وراها تمويل باسم حاجات هو غالباً مش بيؤمن بيها.. فبقى كل دة اكل عيش أو كله اكل عيش.. فجأة تلاقي واحد بيتكلم فيجيله واحد تاني يقول له: باقول لك ايه يا عم انت.. كل عيش.. يعني خليك ساكت وفي حالك واشتغل واكسب وبقك مقفول”.

 واشار الى أن المصريين حولوا أكل العيش لعمليات كثيرة ومتداخلة :”منها كلام بمعنى ايجابي وكلام بمعنى سلبي، ومنها اللي يديلك معنى الاستجداء لما سواق ميكروباص يخبطك ويقول لك معلهش يا أستاذ أنا نازل أكل عيش أو اللي يديلك معنى الاستغناء باللي يقول لك اكل العيش مهم، بس بكرامتي”.

وأكد كمال على أن :”العيش اللي ييجي من حرام عيش فاسد، العيش اللي ييجي بالبلطجة عيش متعفن، العيش اللي ييجي بدون وجه حق عيش سُحت، العيش اللي ييجي بالفهلوة عيش غير مستحق، العيش اللي ييجي على حساب ناس تانية وظلمهم، الله الغني عنه”. وتابع:”عيشك هايجيلك لحد عندك لو رزقك، بس لازم تسعى له،  يعني إيه تسعى له وليه تسعى له مادام رزقك جاي لا محالة؟ السعي هو المشي السريع الأقل من العدو أو الجري وبيستعمل للشخص الجاد في الشئ خير أو شر.. لكن عادة بيستخدم لفظ السعي في أعمال الخير”.