الصحة والجمالالمصريين بجد
بالمستندات:عمر أخدت الإبتدائية والشلل الدماغي حرمني من الدراسة وتحقيق أحلامي ويتمني العلاج بالخارج أو بمستشفيات القوات المسلحة
بسمة رمضان-المصريين بجد
وصل الي بريد قسم التحقيقات بالموقع رسالة من المواطن المصري عمر ابراهيم يشكو فيها إهمال وزارة الصحة وعدم قدرته علي التواصل مع المسئولين لتلقي العلاج بمستشفيات القوات المسلحة وجاء نص الرسالة كالتالي بدون أي تغيير في كلام عمر
“أنا إسمي عمر إبراهيم عندي 24 سنة درست الإبتدائية بصعوبة لأن المدرسة إللي كنت فيها كانوا بيرفضوا يجيبوا لي مرافق يكتب لي في الإمتحان و كانوا بيرفضوا إني أمتحن بالكمبيوتر. بالإضافة إلى إن التعليم هنا مابيراعوش ظروفي و حتى الآن لا يمكنني إستكمال دراستي نظراً لظروفي الخارجة عن إرادتي و أيضاً لإهمال الدولة ليا علاجيا ودراسيا لذلك أنا قررت إني أسعى للعلاج أولاً علشان أقدر أكمل دراستي
أنا اعاني من ضعف في الأعصاب وفي العضلات وفي الحركة وعدم القدرة على الوقوف والمشي والتشخيص الطبي أثبت إصابتي بالشلل الدماغي Cerebral Palsy و شلل تيبسي مع تقلص بالعضلات وأحتاج إلى السفر والعلاج بالخارج. مع العلم أن إصابتي بالشلل الدماغي Cerebral Palsy نتيجة إرتفاع درجة الصفرا بعد ولادتي بإسبوع. أنا لحد دلوقتي مابتعالجش و وزارة الصحة أهملوني و رفضوا إني أتعالج بمستشفيات القوات المسلحة على نفقة الدولة و رفضوا إني أسافر واتعالج بالخارج على نفقة الدولة
من وأنا طفل والدتي ووالدي تعبوا و لفوا بيا في المستشفيات علشان أتعالج
برة في الدول المتقدمة بيهتموا بإللي زي حالتي و أكيد إنتي عارفة كده
و أنا مش حابب إني أبقى قاعد في البيت دايماً وبعدين مافيش حد في البلد ديه بيهتموا بإللي زي حالتي
الطب هنا فشل في علاجي علشان كده أنا مخلي حياتي كلها حرب بلا نوم لأن أنا ليا أحلامي الخاصة و نفسي في حاجات كتير عايز أعيش حياتي طبيعيه زى الناس
طوال عام 2016 كنت بسعى العلاج على نفقة الدولة عملت الإجراءات على مرحلتين، كتبوا لي على 3 حقن بوتكس كعلاج على نفقة الدولة بناءً على تقرير طبي لجنة ثلاثية أول مرة
لان اللجنة العصبية إللي في الإدارة العامة للمجالس الطبية المتخصصة قرروا 3 حقن بوتكس أنا كنت فاكر إن العلاج على نفقة الدولة يعني أتحجز في مستشفى محترمة لحد ما أتعالج وحقن البوتكس إللي اخدتها كعلاج على نفقة الدولة لم تأتي بنتيجة فعالة
وبعد كده بقى حاولت العلاج بالخارج على نفقة الدولة لكن وزارة الصحه رفضت أكثر من مرة
كلمني موظف من مستشفى الحضرة الجامعي و قال لي تعالى علشان إنت مقدم شكوى و تعالى علشان هنعرضك على لجنة العصبية علشان نرد على الشكوى بتقرير اللجنة
أنا لما رحت لاقيت إن الجواب إللي بعتاه وزارة الصحة لمستشفى الحضرة الجامعي علشان أتعرض على لجنة العصبية شاطبة فيه على العلاج بالخارج
ده غير إن لجنة العصبية إتعرضت عليها أخر مرة عملت تقرير يمنع إني أسافر واتعالج بالخارج و بعتوه للجهة إللي بعتت الشكوى للمستشفى
لما قدمت على العلاج بالخارج على نفقة الدولة رفضوا و قرروا تكرار البوتكس
……..
ده اللي حصل معايا بالتفصيل
يذكر انه تم توجيه الرسالة الي إدارة جمعية المصريين بجد للتواصل مع الحالة والتأكد من صحة المستندات المرفقة وتوجيهها الي الجهات المسئولة-وسنواصل متابعة ونشر تطورات الحالة بالموقع
Facebook Comments Box
